రవిబాబు ‘క్రష్’కి కరోనా ఎఫెక్ట్.. మాస్క్‌లతో ముద్దులు

ప్రస్తుతం తెలుగు రాష్ట్రాల్లో కరోనా వైరస్ భయం ఎక్కువగా ఉంది. ముఖ్యంగా హైదరాబాద్‌లో ప్రజలు భయాందోళనకు గురవుతున్నారు. అయితే, భయాందోళనలను పక్కనబెట్టి ముందు జాగ్రత్తగా ఉండాలని, పరిశుభ్రత పాటించాలని, భద్రంగా ఉండాలని ప్రభుత్వాలు, వైద్యులు సూచిస్తున్నారు. ముఖ్యంగా జలుబు, దగ్గు, జ్వరం లాంటి లక్షణాలు ఉంటే ముఖానికి మాస్క్‌లు ధరించాలని సలహా ఇస్తున్నారు. ప్రస్తుతానికైతే బయట తిరిగే చాలా మంది మాస్క్‌లు ధరిస్తున్నారు. అయితే, ఈ కరోనా వైరస్ భయాన్ని, మాస్క్‌లను తన సినిమా ప్రచారానికి వాడుకుంటున్నారు దర్శక నిర్మాత రవిబాబు.సొంత బ్యానర్ ఫ్లయింగ్ ఫ్రాగ్స్ ప్రొడక్షన్స్‌పై స్వీయ దర్శకత్వంలో ర‌విబాబు నిర్మిస్తోన్న చిత్రం ‘క్రష్’. జనవరి 1న ఈ సినిమా టైటిల్ లుక్‌ను విడుదల చేశారు. అప్పట్లో టైటిల్ పోస్టర్ బాగా పాపులర్ అయ్యింది. యువతను టార్గెట్ చేస్తూ ఈ సినిమా తీస్తున్నట్టు టైటిల్ పోస్టర్ ద్వారా చెప్పేశారు రవిబాబు. బికినీలో ఒక అమ్మాయి బీచ్‌లో నడుస్తూ వస్తుంటే ముగ్గురు కుర్రాళ్లు ఆమెను చూసి సొంగ కారుస్తున్నట్టు పోస్టర్‌లో చూపించారు. అయితే, ఆ అమ్మాయి ముఖం కానీ, అబ్బాయిల మొహాలు కానీ ఆ పోస్టర్ చూపించలేదు.